Bagheli Bal Rachnaen

इ रचना आबइ के पहिले परु साल "बघेली छंद विधान" ब्याकारनिक किताबि परकासित होइ चुकी हबइ। अब इ दूसर मउलिक बघेली रचना माहीं , बाल कबितन केर संगरह हमैं। आपन घूंटी केर बोली महतारी अस बहुत पिआर बोली होति हबै। उहौ जब लरिकन गदेलन केरि किताबि होइ त अउर मोहकि अउ मन क गुदगुदाबै बाली होइ जाति हबै। इ कविता संगरह माहीं, बघेली बाल मुक्तक, बघेली बाल गीतिका, बघेली बाल सबइया, बघेली आधुनिक बाल समाइक कबिता, बघेली बाल दोहे, बघेली गीति सहित लगभग 75 रचनन केर संगरह कीन ग हमां।रचना मन अउर आतमां की छुअइ वाली  मनोरंजन कै साथइ साथ बाल मनोविज्ञान की बढ़ाबइ अउर निकही जानकारी देबाबइ बाली हमा। मेर मेर कइ छंदन पै आधारित छांदस, लइ, सुर, ताल बाली लगभग सबै कबिता लरिकन की मानसिकता कै अनुसार, छोट-छोट सब्दन की चुनि कइ बनाई गइ हमां। इ रचना संगरह अपने रिमहीं अउ बघेली समाजि कइ जरूरति अउर लरिकन कइ मन टटोहि के, ओनके सिच्छा बले जोड़इ खातिन बहुतै उपजोगी होई। किताबि मांहीं मोहक अउर छोहगर कबिता लिखइ केर परयास कीन ग हबइ, जउने मा लरिका खेलिन खेलु मा बहुत कुछु सिखिउ पइहीं, अउर पढ़ाई लिखाई बले झुकाउ होई, अइसन पूर बिसुआस हबइ।

मां सरसती केर किरिपा, पुरखन केर असीस, बड़न केर आदर, मीतन अउर सहजोगिन कइ उसासी दिहे के बदउलति ई सरोकार केरि किताबि समाजि की परसित लाग हबइ, निसचित रूप से अपना पंचन केर आतमिक आदर मिली।

पोथी अपना पांच पढ़ी, लड़िकन के पढ़ाई, जउन बना नसान होइ, उहउ बताई, जउने अगले संसकरन माहीं सुधार कीन जाइ सकइ।

किताबि काहीं सजाबइ, सम्हारइ अउर परकासित करइ कराबइ खातिर परकासक आदरनीय जितेन्द्र जी केर आभार मानत, बघेली समाजि के लड़िकन खातिर ई कबिता संगरह "बघेली बाल रचनाएँ" हाजिर हबइ।