Rou Real Rebel vir Jesus

Sy is onbeskaamd `n tiener-rebel, wat soos `n teologiese fout in haar godsdienstige gesin voel. Diep in haar hart wil sy net help om die gebroke wêreld `n beter plek te maak, maar sy voel verlore in haar identiteit. Die maskers wat die wêreld en die kerk voorhou, verpes haar. Sy glo sy is uniek, en dat groepsdruk nie `n houvas op haar het nie. Maar toe haar ouers besluit om te skei, het haar poging om “haar wêreld te red” inmekaar getuimel.

Haar soeke na wie God is motiveer haar om staande te bly, te midde van haar ouers se egskeiding. Sy voel alleen en verlore in `n huis sonder haar ma in die tyd wat sy wil leer van “vrou-wees”. Onwetend druk sy `n masker op haar gesig om haarself te beskerm. Sy vind haarself as `n party girl, wat liefde in die arms van verskillende figure vind. Sy kruisig haarself keer op keer, omdat sy weet dat sy van die pad af en honger vir aandag is. Kos raak haar toevlug om elke stukkende emosie te versmoor.

In `n poging om haarself te vind, gaan studeer sy weg van haar stukkende omstandighede. Na `n bekeringsoomblik, begin haar verhouding met die Here vorm aanneem. Die studente partytjies vermaak haar glad nie, maar wel die nuwe “Christen boyfriends”.

Sy raak gewortel as joernalis op die Kaapse platteland wie se wêreld vining in `n sendingveld ontaard. `n Traumatiese motorongeluk en `n reuse liefdesteleurstelling kry haar nie onder nie. Die gebeure moedig haar aan, om met groot ywer haar getuienis en die verlossingsboodskap met ander te deel. Nog `n voorval stroop haar van alles wat sy besit. Dít verander haar lewe onherroeplik. Sy soek antwoorde by die Here!

In haar soeke ontmoet sy haar trouman en begin `n nuwe “droomwerk”. Sy voel soos `n skaapwagter in haar nuwe werksgeleentheid, maar haar huwelik verskaf genoeg opwinding en lewenslesse om haar avontuurlustigheid brandend te hou.Haar liefde vir haar eerste Bruidegom, hou haar nederig en biddend in die seisoen. Die egpaar word die diepe Afrika ingestuur waar hulle liefde vir mense tot op die uiterste getoets word. Tog kies sy dat seer haar nie sal terughou, om ander met die evangelie te inspireer. Terug in die land kom sy voor `n reuse kruispad. Gaan sy kies om te voldoen aan wat mense verwag of gaan sy braaf wees en haar droom volg?